*संकट १५८ मिमी पावसाचे; बारामती अवघ्या दोन तासांत पुन्हा ॲक्शन मोडमध्ये!*
एका रात्रीत मुसळधार पावसाने शहर जलमय; दोन तासांत प्रमुख रस्त्यांवरील पाण्याचा निचरा करून वाहतूक पूर्ववत : अजितदादांची बारामती संकटातही थांबली नाही!
*सुनेत्रावहिनी पवार यांचे तातडीने मार्गदर्शन; पार्थदादा, जयदादांच्या सूचना; नगराध्यक्ष, मुख्याधिकारी, नगरसेवक आणि कर्मचाऱ्यांची पहाटेपासून प्रत्यक्ष मैदानात उतरून युद्धपातळीवर कामगिरी*
बारामती : एका रात्रीत तब्बल १५८ मिमी पाऊस! शहरातील सखल भाग जलमय, प्रमुख रस्त्यांवर पाण्याचे लोट आणि वाहतुकीसमोर मोठे आव्हान... मात्र, या नैसर्गिक संकटापुढे बारामतीची यंत्रणा डगमगली नाही. पावसाचा जोर ओसरताच अवघ्या दोन तासांत प्रमुख रस्त्यांवरील पाण्याचा निचरा करून वाहतूक पूर्ववत करण्यात आली. विशेष म्हणजे, नगराध्यक्ष, मुख्याधिकारी, नगरसेवक आणि नगरपरिषदेचे अधिकारी-कर्मचारी केवळ आदेश देत बसले नाहीत, तर स्वतः रस्त्यावर उतरून परिस्थिती नियंत्रणात आणण्यासाठी झटले. उपमुख्यमंत्री सुनेत्रावहिनी पवार यांचे सातत्यपूर्ण मार्गदर्शन, खासदार पार्थदादा पवार व युवा नेते जयदादा पवार यांच्या सूचना आणि स्थानिक प्रशासनाच्या तत्पर समन्वयातून अवघ्या दोन तासांत परिस्थिती पूर्वपदावर आणण्याच्या दिशेने महत्त्वपूर्ण कामगिरी करण्यात आली. संकट कितीही मोठे असो, अजितदादांनी घडवलेली बारामतीची कामाची गती आणि शिस्त थांबणार नाही, याचा प्रत्यय या निमित्ताने आला.
सोमवारी पहाटेपासून बारामती शहरात मुसळधार पावसाने अक्षरशः धुमाकूळ घातला. सकाळी सात वाजेपर्यंत शहरात तब्बल १५८ मिमी पावसाची नोंद झाली. अवघ्या काही तासांत महिनाभराचा पाऊस पडावा, अशी परिस्थिती निर्माण झाल्याने शहरातील अनेक सखल भागांत गुडघाभर पाणी साचले. मुख्य भिगवण रस्त्यासह अन्य प्रमुख रस्त्यांवर पाणी साचल्याने वाहतुकीचा प्रश्न गंभीर बनला होता. सकाळच्या वेळेत नागरिकांची होणारी गैरसोय आणि संभाव्य वाहतूक कोंडी लक्षात घेता परिस्थितीचे गांभीर्य ओळखून नगरपरिषद प्रशासनाने तातडीने आपत्कालीन उपाययोजना हाती घेतल्या.
या संपूर्ण घटनाक्रमातील सर्वांत महत्त्वाची बाब म्हणजे, अवघ्या दोन तासांत प्रमुख रस्त्यांवरील पाण्याचा निचरा करून वाहतुकीसाठी रस्ते मोकळे करण्यात आले. मुख्य भिगवण रस्त्यासह अन्य महत्त्वाच्या मार्गांवरील पाणी काढण्यासाठी आवश्यक यंत्रणा तातडीने कार्यान्वित करण्यात आली. पाण्याचा निचरा करणे, अडथळे दूर करणे आणि वाहतूक सुरळीत करण्यासाठी अधिकारी-कर्मचारी युद्धपातळीवर काम करत होते. त्यामुळे पावसामुळे निर्माण झालेली वाहतुकीची कोंडी कमी होण्यास मदत झाली आणि नागरिकांना मोठा दिलासा मिळाला. नैसर्गिक संकट कितीही मोठे असले तरी प्रशासनाची तत्परता आणि योग्य समन्वय असेल, तर परिस्थिती किती वेगाने नियंत्रणात आणता येते, याचे हे ठळक उदाहरण ठरले.
पावसाची तीव्रता आणि शहरातील परिस्थितीची माहिती मिळताच उपमुख्यमंत्री सुनेत्रावहिनी पवार यांनी तातडीने प्रशासनाशी संपर्क साधला. नागरिकांची गैरसोय होऊ नये, सखल भागांतील पाण्याचा निचरा त्वरित व्हावा आणि वाहतूक सुरळीत राहावी, यासाठी त्यांनी आवश्यक सूचना दिल्या. नगराध्यक्ष सचिन सातव आणि मुख्याधिकारी पंकज भुसे यांच्याशी दूरध्वनीवरून संपर्क साधत त्या परिस्थितीचा सातत्याने आढावा घेत होत्या.
खासदार पार्थदादा पवार आणि युवा नेते जयदादा पवार यांनीही परिस्थितीची माहिती घेऊन आवश्यक सूचना केल्या. वरिष्ठ स्तरावरून मिळणारे मार्गदर्शन आणि स्थानिक प्रशासनाची प्रत्यक्ष कृती यांचा योग्य समन्वय साधण्यात आला. त्यातून नगरपरिषदेची संपूर्ण यंत्रणा तातडीने कामाला लागली.
या मोहिमेचे आणखी एक वैशिष्ट्य म्हणजे नगराध्यक्ष, मुख्याधिकारी आणि नगरसेवकांनी केवळ प्रशासनाला सूचना देण्यापुरती भूमिका न ठेवता प्रत्यक्ष फिल्डवर उपस्थित राहून परिस्थितीचा आढावा घेतला. नगरपरिषदेच्या कर्मचाऱ्यांसोबत खांद्याला खांदा लावून काम करत पाण्याचा निचरा आणि रस्ते मोकळे करण्याच्या कामात सक्रिय सहभाग घेतला. आरोग्य व स्वच्छता विभागासह संबंधित विभागांचे अधिकारी-कर्मचारी पहाटेपासून कार्यरत होते. सार्वजनिक बांधकाम विभाग आणि वाहतूक विभागाशीही समन्वय साधण्यात आला.
लोकप्रतिनिधी, अधिकारी आणि कर्मचारी यांच्यातील हा प्रत्यक्ष कृतीतून दिसलेला समन्वयच दोन तासांत प्रमुख रस्त्यांवरील परिस्थिती नियंत्रणात आणण्यासाठी महत्त्वाचा ठरला.
बारामतीच्या विकासाला गती देताना स्वर्गीय अजितदादा पवार यांनी शहराला केवळ विकासकामे दिली नाहीत, तर कामाची एक वेगळी शिस्त, तत्परता आणि जबाबदारीची कार्यसंस्कृतीही निर्माण केली. कोणतेही संकट असो, नागरिकांचा प्रश्न असो किंवा प्रशासकीय अडचण असो, स्वतः पुढाकार घेऊन घटनास्थळी पोहोचायचे आणि प्रश्न मार्गी लागेपर्यंत पाठपुरावा करायचा, ही अजितदादांची कार्यपद्धती होती.
आजच्या मुसळधार पावसाच्या संकटात याच कार्यसंस्कृतीचे दर्शन पुन्हा एकदा घडले. सुनेत्रावहिनी पवार यांचे मार्गदर्शन, पार्थदादा आणि जयदादांच्या सूचना, नगराध्यक्ष व मुख्याधिकाऱ्यांचा समन्वय आणि नगरसेवकांसह कर्मचाऱ्यांनी प्रत्यक्ष मैदानात उतरून केलेले काम यातून अजितदादांनी बारामतीला दिलेला कामाचा वारसा पुढे सुरू असल्याचे दिसून आले.
एका रात्रीत १५८ मिमी पावसाचे संकट आले, शहर जलमय झाले; मात्र अवघ्या दोन तासांत प्रमुख रस्त्यांवरील पाण्याचा निचरा करून वाहतूक पूर्ववत करण्याची कामगिरी नगरपरिषदेच्या यंत्रणेने केली. संकटाच्या वेळी केवळ आश्वासने नव्हे, तर प्रत्यक्ष कृती महत्त्वाची असते, हे बारामतीने दाखवून दिले. अजितदादांनी निर्माण केलेली कामाची गती, शिस्त आणि नागरिकांप्रती असलेली बांधिलकी आजही सुनेत्रावहिनी यांच्याकडून कायम आहे. म्हणूनच संकट कितीही मोठे असो, अजितदादांची बारामती थांबणार नाही!
*चौकट - १*
"स्वर्गीय अजितदादा पवार यांनी बारामतीला विकासाची दिशा देतानाच कामाची एक विशिष्ट शिस्त आणि कार्यपद्धती घालून दिली आहे. कोणतीही अडचण आली किंवा संकट उभे राहिले, तर नागरिकांच्या मदतीला तत्काळ धावून जायचे, ही त्यांची शिकवण आहे. आज उपमुख्यमंत्री सुनेत्रावहिनी पवार यांच्या मार्गदर्शनानुसार तसेच खासदार पार्थदादा आणि जयदादा यांच्या सूचनांनुसार आम्ही सर्वांनी एकत्रितपणे काम केले. नगरसेवकांनीही नगरपरिषदेच्या कर्मचाऱ्यांसोबत प्रत्यक्ष फिल्डवर उतरून काम केले. अवघ्या दोन तासांत प्रमुख रस्त्यांवरील पाण्याचा निचरा करून वाहतूक सुरळीत करण्यासाठी सर्वांनी प्रयत्नांची पराकाष्ठा केली. नागरिकांची गैरसोय कमीत कमी व्हावी, यालाच आम्ही प्राधान्य दिले. अजितदादांनी बारामतीकरांना दिलेला विश्वास आणि त्यांनी निर्माण केलेली कामाची संस्कृती सुनेत्रावहिनींच्या मार्गदर्शनाखाली आम्ही पुढे घेऊन जात आहोत. कितीही मोठे संकट आले तरी अजितदादांची बारामती कधीही थांबणार नाही!"
— श्री. सचिन सातव
नगराध्यक्ष, बारामती नगरपरिषद
*चौकट - २*
"शहरात अवघ्या काही तासांत १५८ मिमी पावसाची नोंद झाली. अचानक आलेल्या या मुसळधार पावसामुळे काही सखल भागांत पाणी साचले होते. परिस्थितीचे गांभीर्य लक्षात घेऊन उपमुख्यमंत्री सुनेत्रावहिनी पवार यांनी तातडीने माहिती घेऊन आवश्यक उपाययोजना करण्याच्या सूचना दिल्या. त्यानुसार नगरपरिषदेच्या संबंधित विभागांना त्वरित कार्यान्वित करण्यात आले. पाण्याचा निचरा करण्यासाठी आवश्यक यंत्रणा कामाला लावण्यात आली. नगराध्यक्ष, नगरसेवक, अधिकारी आणि कर्मचारी प्रत्यक्ष फिल्डवर उपस्थित राहून काम करत होते. सार्वजनिक बांधकाम विभाग आणि वाहतूक विभागाशीही समन्वय साधण्यात आला. परिणामी, अवघ्या दोन तासांत मुख्य भिगवण रस्त्यासह अन्य प्रमुख रस्त्यांवरील पाण्याचा निचरा करून वाहतूक सुरळीत करण्यात आली. नागरिकांची सुरक्षितता आणि गैरसोय टाळणे यालाच प्रशासनाने सर्वोच्च प्राधान्य दिले."
— श्री. पंकज भुसे
मुख्याधिकारी, बारामती नगरपरिषद
No comments:
Post a Comment