आपत्कालीन क्षणी पोलीस केवळ मदतीला धावणार नाहीत, तर जीव वाचवण्यासाठीही सज्ज..!”

“आपत्कालीन क्षणी पोलीस केवळ मदतीला धावणार नाहीत, तर जीव वाचवण्यासाठीही सज्ज..!” 

*बारामती शहर पोलिसांना CPR व Basic Life Support चे प्रात्यक्षिक प्रशिक्षण; NIMA बारामती व IDA बारामती–फलटण शाखेचा स्तुत्य सामाजिक उपक्रम* 

बारामती : नागरिकांच्या सुरक्षिततेसाठी अहोरात्र कर्तव्य बजावणाऱ्या पोलिसांना वैद्यकीय आपत्कालीन परिस्थितीतही तातडीने जीवनरक्षक मदत करता यावी, या उद्देशाने बारामती शहर पोलीस स्टेशन येथे पोलीस अधिकारी व अंमलदारांसाठी CPR व Basic Life Support (BLS) प्रशिक्षण कार्यशाळेचे आयोजन करण्यात आले. राष्ट्रीय एकात्मिक वैद्यकीय संघटना (NIMA), बारामती व इंडियन डेंटल असोसिएशन (IDA), बारामती–फलटण शाखेच्या डॉक्टरांच्या टीमने सामाजिक बांधिलकीतून हे प्रशिक्षण प्रात्यक्षिकासह दिले.

पोलीस हे अनेकदा अपघात, गर्दी, मिरवणूक, सार्वजनिक कार्यक्रम किंवा अन्य आपत्कालीन घटनांच्या ठिकाणी सर्वप्रथम पोहोचणाऱ्या यंत्रणांपैकी एक असतात. एखाद्या व्यक्तीला अचानक Cardiac Arrest आल्यास किंवा त्याचा श्वासोच्छ्वास बंद झाल्यास वैद्यकीय मदत उपलब्ध होईपर्यंतची सुरुवातीची काही मिनिटे अत्यंत महत्त्वाची असतात. अशा निर्णायक क्षणी योग्य पद्धतीने CPR देता आल्यास संबंधित व्यक्तीचे प्राण वाचविण्याच्या प्रयत्नांना मोठी मदत होऊ शकते.

याच अनुषंगाने डॉक्टरांच्या टीमने उपस्थित पोलीस अधिकारी व अंमलदारांना CPR म्हणजे काय, त्याचे महत्त्व, Cardiac Arrest ची लक्षणे कशी ओळखावीत, व्यक्तीची प्रतिसादक्षमता व श्वासोच्छ्वास कसा तपासावा, आपत्कालीन वैद्यकीय मदत कशी बोलवावी आणि आवश्यक परिस्थितीत CPR ची प्रक्रिया योग्य रीतीने कशी करावी, याबाबत सविस्तर मार्गदर्शन केले. प्रत्यक्ष प्रात्यक्षिकाद्वारे जीवनरक्षक प्रक्रियेचे प्रशिक्षण देण्यात आल्याने अधिकारी व अंमलदारांना आपत्कालीन परिस्थितीत करावयाच्या तातडीच्या कृतींची माहिती देण्यात आली.

विशेषतः गणेशोत्सव, पालखी सोहळे, मिरवणुका, बंदोबस्त तसेच मोठ्या गर्दीच्या कार्यक्रमांमध्ये हजारो नागरिक एकत्र येतात. अशा गर्दीमध्ये एखाद्या नागरिकाला अचानक हृदयविकाराचा त्रास, Cardiac Arrest, श्वासोच्छ्वासासंबंधी गंभीर समस्या किंवा अन्य वैद्यकीय आपत्कालीन परिस्थिती उद्भवल्यास घटनास्थळी उपस्थित प्रशिक्षित पोलीस कर्मचारी तातडीचा प्रथम प्रतिसाद देऊ शकतील, या उद्देशाने सदर प्रशिक्षण आयोजित करण्यात आले.

पोलीस दलाचे काम केवळ कायदा व सुव्यवस्था राखण्यापुरते मर्यादित नसून संकटाच्या प्रत्येक क्षणी नागरिकांच्या जीविताचे संरक्षण करणे हेदेखील पोलिसांच्या सेवाभावाचे महत्त्वाचे अंग आहे. त्यामुळे बंदोबस्तावर तैनात असलेल्या पोलिसांना अशा जीवनरक्षक कौशल्यांचे प्रशिक्षण मिळणे हे नागरिकांच्या सुरक्षिततेच्या दृष्टीने विशेष महत्त्वाचे आहे.

या उपक्रमाला केवळ पोलीस स्टेशनपुरते मर्यादित न ठेवता त्याची व्याप्ती सर्वसामान्य नागरिकांपर्यंत पोहोचविण्याबाबतही डॉक्टरांच्या टीमशी सकारात्मक चर्चा करण्यात आली. बारामती शहरातील मार्केट परिसर, एस.टी. स्टँड, शाळा, महाविद्यालये तसेच नागरिकांची मोठी वर्दळ असणाऱ्या ठिकाणी CPR व प्राथमिक जीवनरक्षक प्रशिक्षण उपक्रम आयोजित करून अधिकाधिक नागरिकांना प्रशिक्षित प्रथम प्रतिसादक बनविण्याचा प्रयत्न करण्याबाबत चर्चा करण्यात आली.

एखाद्या आपत्कालीन प्रसंगी डॉक्टर किंवा रुग्णवाहिका येईपर्यंत आपल्या शेजारी असलेल्या व्यक्तीला नेमके काय करावे हे माहीत असणे अत्यंत महत्त्वाचे आहे. त्यामुळे “प्रत्येक कुटुंबात आणि समाजाच्या प्रत्येक घटकात किमान एक प्रशिक्षित प्रथम प्रतिसादक तयार व्हावा” या व्यापक सामाजिक उद्देशातून अशा प्रशिक्षणाचा नागरिकांपर्यंत विस्तार करण्याचा मानस व्यक्त करण्यात आला.

सदर उपक्रम मा. पोलीस अधीक्षक श्री. संदीप सिंह गिल्ल, मा. अपर पोलीस अधीक्षक श्री. गणेश बिरादार व मा. उपविभागीय पोलीस अधिकारी श्री. चैतन्य कदम यांच्या मार्गदर्शनाखाली आयोजित करण्यात आला.

या प्रशिक्षणासाठी आपला बहुमूल्य वेळ देऊन पोलिसांना जीवनरक्षक कौशल्यांचे प्रशिक्षण देणाऱ्या NIMA बारामती व इंडियन डेंटल असोसिएशन (IDA), बारामती–फलटण शाखेच्या डॉक्टरांच्या संपूर्ण टीमचे बारामती शहर पोलीस स्टेशनच्या वतीने मनःपूर्वक आभार व्यक्त करण्यात आले. समाजातील वैद्यकीय तज्ज्ञ आणि पोलीस यंत्रणा एकत्र येऊन नागरिकांच्या जीवितरक्षणासाठी पुढाकार घेत असल्याने हा उपक्रम “पोलीस आणि डॉक्टर, दोघांचेही ध्येय एकच, संकटात नागरिकाचा जीव वाचविणे” या सामाजिक बांधिलकीचा प्रेरणादायी संदेश देणारा ठरला.

*“गर्दीत कायदा-सुव्यवस्था राखणारे हात, गरज पडल्यास जीवन वाचवण्यासाठीही पुढे येतील!”* 

 *प्रभारी पोलीस निरीक्षक* 

 *बारामती शहर पोलीस स्टेशन*